ಹರಿಪಾದ ಚಟ್ಟೋಪಾಧ್ಯಾಯ

ಹರಿಪಾದ ಚಟ್ಟೋಪಾಧ್ಯಾಯ (೧೮೯೭ - ೧೧ ನವೆಂಬರ್ ೧೯೬೭) ಒಬ್ಬ ಭಾರತೀಯ ರಾಜಕಾರಣಿ, ಲೋಕಸಭೆಯ ಸಂಸದ ಮತ್ತು ಬಂಗಾಳಿ ಕ್ರಾಂತಿಕಾರಿ.

ಆರಂಭಿಕ ಜೀವನ

ಚಟ್ಟೋಪಾಧ್ಯಾಯರು ನಾಡಿಯಾದ ಕೃಷ್ಣನಗರದಲ್ಲಿ ಜನಿಸಿದರು. ಅವರು ಬಂಗಾಳಿ ಕ್ರಾಂತಿಕಾರಿ ಬಾಘಾ ಜತಿನ್ ಅವರ ತಾಯಿಯ ಸೋದರಸಂಬಂಧಿಯಾಗಿದ್ದರು. ಅವರ ತಂದೆ ಬಸಂತ ಕುಮಾರ್ ಚಟ್ಟೋಪಾಧ್ಯಾಯ ಅವರು ಪ್ರತಿಷ್ಠಿತ ವಕೀಲರಾಗಿದ್ದರು ಮತ್ತು ಶಿಲೈದಾ ಮತ್ತು ಕೋಲ್ಕತ್ತಾದ ಟ್ಯಾಗೋರ್ ಕುಟುಂಬದೊಂದಿಗೆ ಸಂಬಂಧ ಹೊಂದಿದ್ದರು. ಹರಿಪಾದ ಚಟ್ಟೋಪಾಧ್ಯಾಯರು ಕಲ್ಕತ್ತಾ ವಿಶ್ವವಿದ್ಯಾನಿಲಯಕ್ಕೆ ಪ್ರವೇಶಿಸಿ, ಡಾ. ಪ್ರಫುಲ್ಲ ಚಂದ್ರ ರೇ ಅವರ ಮಾರ್ಗದರ್ಶನದಲ್ಲಿ ರಸಾಯನಶಾಸ್ತ್ರದಲ್ಲಿ ಪ್ರಥಮ ದರ್ಜೆಯೊಂದಿಗೆ ಎಮ್.ಎಸ್ ಸಿ ಉತ್ತೀರ್ಣರಾದರು. ವಿದ್ಯಾರ್ಥಿ ಜೀವನದಲ್ಲಿ ಅವರು ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರೊಂದಿಗೆ ಸ್ನೇಹ ಬೆಳೆಸಿದರು.

ರಾಜಕೀಯ ಜೀವನ

ಚಟ್ಟೋಪಾಧ್ಯಾಯರು ಭಾರತೀಯ ರಾಷ್ಟ್ರೀಯ ಚಳವಳಿಯೆಡೆಗೆ ಆಕರ್ಷಿತರಾದರು ಮತ್ತು ನಾಡಿಯಾ ಜಿಲ್ಲೆಯಲ್ಲಿ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್‌ನ ಸದಸ್ಯತ್ವವನ್ನು ಪಡೆದರು. ೧೯೨೧ ರಲ್ಲಿ ಮಹಾತ್ಮಾ ಗಾಂಧಿಯವರ ನೇತೃತ್ವದಲ್ಲಿ ಅಸಹಕಾರ ಚಳವಳಿಗೆ ಸೇರಿದ ನಂತರ ಅವರು ಮೊದಲ ಬಾರಿಗೆ ಢಾಕಾ ಜೈಲಿನಲ್ಲಿ ಬಂಧಿಸಲ್ಪಟ್ಟರು. ಅವರು ೧೯೪೨ ರಲ್ಲಿ ಭಾರತ ಬಿಟ್ಟು ತೊಲಗಿ ಚಳುವಳಿಯೊಂದಿಗೆ ಸೇರಿಕೊಂಡರು ಮತ್ತು ಹಲವಾರು ಬಾರಿ ಬಂಧಿಸಲ್ಪಟ್ಟರು. ಅವರು ಕೊಮಿಲ್ಲಾದಲ್ಲಿ ರಾಷ್ಟ್ರೀಯತಾವಾದಿ ಅಭಯ್ ಆಶ್ರಮ ಮತ್ತು ನಾಡಿಯಾ ಜಿಲ್ಲೆಯ ಸಾಹೇಬ್‌ನಗರದಲ್ಲಿ ಆಗ್ರೋ ಕೈಗಾರಿಕಾ ಸಂಸ್ಥೆಯ ಸಂಸ್ಥಾಪಕರಲ್ಲಿ ಒಬ್ಬರು. ಅವರು ೧೯೩೭ ರಿಂದ ೧೯೫೧ ರವರೆಗೆ ಪಶ್ಚಿಮ ಬಂಗಾಳ ವಿಧಾನಸಭೆಯಲ್ಲಿ (ಅಂದಿನ ಬಾಂಗಿಯೋ ಬಯಾಬೊಸ್ತಪೋಕ್ ಸಭೆ ) ಕಾಂಗ್ರೆಸ್ ಪಕ್ಷದ ಸಕ್ರಿಯ ಸದಸ್ಯರಾದರು. ಅವರು ೧೯೫೧ ರಲ್ಲಿ ಕರೀಂಪುರದಲ್ಲಿ (ವಿಧಾನಸಭಾ ಕ್ಷೇತ್ರ) ಸ್ಪರ್ಧಿಸಿದರು ಮತ್ತು ಕಿಸಾನ್ ಮಜ್ದೂರ್ ಪ್ರಜಾ ಪಾರ್ಟಿಯ ಬ್ಯಾನರ್‌ನಲ್ಲಿ ಸ್ಥಾನವನ್ನು ಗೆದ್ದರು. ಚಟ್ಟೋಪಾಧ್ಯಾಯ ಅವರು ೧೯೬೨ ಮತ್ತು ೧೯೬೭ ರಲ್ಲಿ ಕ್ರಮವಾಗಿ ನಬದ್ವೀಪ್ (ಲೋಕಸಭಾ ಕ್ಷೇತ್ರ) ಮತ್ತು ಕೃಷ್ಣನಗರ (ಲೋಕಸಭಾ ಕ್ಷೇತ್ರ) ದಿಂದ ಸ್ವತಂತ್ರ ಅಭ್ಯರ್ಥಿಯಾಗಿ ಆಯ್ಕೆಯಾದರು. ಅವರು ಭಾರತೀಯ ರಾಜಕೀಯದಲ್ಲಿ ಉತ್ತಮ ವಾಗ್ಮಿ ಮತ್ತು ಸಂಸದೀಯರಾಗಿ ಜನಪ್ರಿಯರಾಗಿದ್ದರು.

ವೈಯಕ್ತಿಕ ಜೀವನ

ಚಟ್ಟೋಪಾಧ್ಯಾಯ ಅವರ ಒಬ್ಬನೇ ಮಗ ಅಭಿಜಿತ್ ಚಟ್ಟೋಪಾಧ್ಯಾಯ. ಅಭಿಜಿತ್ ನಂತರ ಭಾರತೀಯ ಸೇನೆಯಲ್ಲಿ ಲೆಫ್ಟಿನೆಂಟ್ ಆದರು ಮತ್ತು ೧೯೬೫ ರ ಭಾರತ-ಪಾಕಿಸ್ತಾನ ಯುದ್ಧದ ಸಮಯದಲ್ಲಿ ಕಾಶ್ಮೀರದ ಯುದ್ಧಭೂಮಿಯಲ್ಲಿ ನಿಧನರಾದರು. ಇಚೋಗಿಲ್ ಬಂಡ್ ಕದನಕ್ಕೆ ಬೆಟಾಲಿಯನ್ ಅನ್ನು ಮುನ್ನಡೆಸುತ್ತಿರುವಾಗ ಪಾಕಿಸ್ತಾನದ ಪ್ರತಿದಾಳಿಯಲ್ಲಿ ಲಾಹೋರ್ ಬಳಿ ಕೊಲ್ಲಲ್ಪಟ್ಟರು.

ಸಾವು

ಚಟ್ಟೋಪಾಧ್ಯಾಯ ೧೧ ನವೆಂಬರ್ ೧೯೬೭ ರಂದು ನಿಧನರಾದರು.