ರಾಮಸಮುದ್ರ ಕೆರೆ, ಕಾರ್ಕಳ

ರಾಮಸಮುದ್ರ ಕೆರೆಯು ಕರ್ನಾಟಕದ ಉಡುಪಿ ಜಿಲ್ಲೆಯ ಕಾರ್ಕಳ ಪಟ್ಟಣದಲ್ಲಿರುವ ಸಿಹಿನೀರಿನ ಸರೋವರವಾಗಿದೆ. ಇದು ಕಾರ್ಕಳದಿಂದ ಸುಮಾರು ೨ ಕಿಲೋಮೀಟರ್ ದೂರದಲ್ಲಿದೆ. ರಾಮಸಮುದ್ರ ಸರೋವರವನ್ನು ರಾಮ ಸರೋವರ ಎಂದೂ ಕರೆಯುತ್ತಾರೆ. ಈ ಸರೋವರವು ಪಶ್ಚಿಮ ಘಟ್ಟಗಳ ತಪ್ಪಲಿನಲ್ಲಿದೆ ಮತ್ತು ಹಸಿರು ಕಾಡುಗಳು ಹಾಗೂ ಬೆಟ್ಟಗಳಿಂದ ಆವೃತವಾಗಿದೆ.

ರಚನೆ

ಈ ಸರೋವರವು ವರಾಹಿ ನದಿಗೆ ಅಡ್ಡಲಾಗಿ ಅಣೆಕಟ್ಟನ್ನು ನಿರ್ಮಿಸುವ ಮೂಲಕ ರೂಪುಗೊಂಡಿತು. ಈ ಸರೋವರವು ಸುಮಾರು ೪೫೦ ಎಕರೆ ವಿಸ್ತೀರ್ಣವನ್ನು ಹೊಂದಿದೆ ಮತ್ತು ಗರಿಷ್ಠ ೩೮ ಅಡಿ ಆಳವನ್ನು ಹೊಂದಿದೆ. ಇದು ಕಾರ್ಕಳ ಪಟ್ಟಣ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಿಗೆ ಕುಡಿಯುವ ನೀರಿನ ಪ್ರಮುಖ ಮೂಲವಾಗಿದೆ.

ಇತಿಹಾಸ

ಈ ೧೪ ನೇ ಶತಮಾನದ ಕೊನೆಯ ತ್ರೈಮಾಸಿಕದಲ್ಲಿ ರಚಿಸಲಾಗಿದೆ ಎಂದು ನಂಬಲಾಗಿದೆ. ಈ ಸಮಯದಲ್ಲಿ, ಈ ಕೊಳವನ್ನು ವಾಸ್ತವವಾಗಿ ರಾಜ ವೀರ ಭೈರವನ ಮಗ ಮತ್ತು ವೀರಪಾಂಡ್ಯನ ಸಹೋದರನಾದ ರಾಮನಾಥನ ನೆನಪಿಗಾಗಿ ರಚಿಸಲಾಗಿದೆ. ರಾಜ ವೀರ ಭೈರವ ಧಾರ್ಮಿಕ ದೃಷ್ಟಿ ಹೊಂದಿರುವ ಉದಾರ ವ್ಯಕ್ತಿ ಎಂದು ಹೇಳಲಾಗುತ್ತದೆ. ಅವರು ಕಾರ್ಕಳದಲ್ಲಿ ವಿವಿಧ ಬಸದಿಗಳು ಮತ್ತು ದೇವಾಲಯಗಳ ನಿರ್ಮಾಣದ ಹಿಂದಿನ ಪ್ರಮುಖ ಪ್ರೇರಕರಾಗಿದ್ದರು. ಅವರಿಗೆ ರಾಮನಾಥ ಮತ್ತು ವೀರಪಾಂಡ್ಯ ಎಂಬ ಹೆಸರಿನ ಇಬ್ಬರು ಗಂಡು ಮಕ್ಕಳಿದ್ದರು. ದುರದೃಷ್ಟವಶಾತ್, ಅವನ ಮಗ ರಾಮನಾಥನು ಆತನ ತಂದೆ ವೀರ ಭೈರವನ ಮುಂದೆಯೇ ನಿಧನರಾದರು. ಆಗ ರಾಜ ವೀರ ಭೈರವನು ತನ್ನ ಮಗನಿಗೆ ಕಾಣಿಕೆಯಾಗಿ ರಾಮಸಮುದ್ರ ಸರೋವರವನ್ನು ನಿರ್ಮಿಸಿದನೆಂದು ಹೇಳಲಾಗುತ್ತದೆ.

ವಿಶೇಷತೆ

ಕಾರ್ಕಳ ಪಟ್ಟಣ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳಿಗೆ ಕುಡಿಯುವ ನೀರಿನ ಪ್ರಮುಖ ಮೂಲವಾಗಿರುವ ಈ ಕೊಳವು ಹಲವಾರು ಖಾಯಿಲೆಗಳನ್ನು ಗುಣಪಡಿಸುವ ಗುಣಗಳನ್ನು ಹೊಂದಿದೆ ಎಂದು ಹೇಳಲಾಗುತ್ತದೆ ಮತ್ತು ಈ ಕೆರೆಯು ಎಂದಿಗೂ ಒಣಗಿಲ್ಲ ಎಂದು ನಂಬಲಾಗಿದೆ.

ಆಕರ್ಷಣೆ

ರಾಮಸಮುದ್ರ ಸರೋವರದ ಪ್ರಮುಖ ಆಕರ್ಷಣೆಯೆಂದರೆ ಇಲ್ಲಿ ಕಾಣಸಿಗುವ ವೈವಿಧ್ಯಮಯ ಪಕ್ಷಿಗಳು. ಈ ಸರೋವರವು ಚಳಿಗಾಲದ ತಿಂಗಳುಗಳಲ್ಲಿ ಭೇಟಿ ನೀಡುವ ಹಲವಾರು ವಲಸೆ ಹಕ್ಕಿಗಳನ್ನು ಒಳಗೊಂಡಂತೆ ೧೦೦ ಕ್ಕೂ ಹೆಚ್ಚು ಜಾತಿಯ ಪಕ್ಷಿಗಳಿಗೆ ನೆಲೆಯಾಗಿದೆ. ಇಲ್ಲಿ ಕಂಡುಬರುವ ಕೆಲವು ಸಾಮಾನ್ಯ ಪಕ್ಷಿ ಪ್ರಭೇದಗಳಲ್ಲಿ ಮಿಂಚುಳ್ಳಿಗಳು, ಬೆಳ್ಳಕ್ಕಿಗಳು, ಬಾತುಕೋಳಿಗಳು ಮತ್ತು ಕೊಕ್ಕರೆಗಳು ಸೇರಿವೆ. ಸರೋವರದಲ್ಲಿನ ನೀರು ಸ್ಫಟಿಕದಂತೆ ಸ್ಪಷ್ಟವಾಗಿದೆ.

ಈ ಸರೋವರದ ದಡದಲ್ಲಿ ಶ್ರೀರಾಮನಿಗೆ ಅರ್ಪಿತವಾದ ಪುರಾತನ ದೇವಾಲಯವಿದೆ. ಈ ದೇವಾಲಯವನ್ನು ಕ್ರಿ.ಶ. ೧೦ ನೇ ಶತಮಾನದಲ್ಲಿ ನಿರ್ಮಿಸಲಾಗಿದೆ ಎಂದು ನಂಬಲಾಗಿದೆ. ಈ ದೇವಾಲಯವು ಸಂಕೀರ್ಣವಾದ ಕೆತ್ತನೆಗಳು ಮತ್ತು ಶಿಲ್ಪಗಳನ್ನು ಹೊಂದಿದೆ. ದೇವಾಲಯದಲ್ಲಿ ನಡೆಯುವ ಹಬ್ಬಗಳು ಮತ್ತು ವಿಶೇಷ ಸಂದರ್ಭಗಳಲ್ಲಿ ಅನೇಕ ಭಕ್ತರು ಇಲ್ಲಿಗೆ ಆಗಮಿಸುತ್ತಾರೆ.

ಮನರಂಜನೆ

ರಾಮಸಮುದ್ರ ಸರೋವರದಲ್ಲಿ ಮನರಂಜನಾ ಚಟುವಟಿಕೆಯೂ ಇದೆ. ಅದುವೇ ದೋಣಿ ವಿಹಾರ(ಬೋಟಿಂಗ್). ಇಲ್ಲಿಗೆ ಆಗಮಿಸುವ ಪ್ರವಾಸಿಗರು ಪೆಡಲ್ ಬೋಟ್ ಅಥವಾ ಸಾಲು ದೋಣಿಯನ್ನು ಬಾಡಿಗೆಗೆ ಪಡೆಯಬಹುದಾಗಿದೆ. ಸರೋವರ ಮತ್ತು ಸುತ್ತಮುತ್ತಲಿನ ಬೆಟ್ಟಗಳ ದೃಶ್ಯಗಳನ್ನು ಸವಿಯಲು ಹಾಗೂ ಇಲ್ಲಿ ನೆಲೆಸಿರುವ ಹಲವಾರು ಪಕ್ಷಿಗಳನ್ನು ವೀಕ್ಷಿಸಲು ಬೋಟಿಂಗ್ ಉತ್ತಮ ಮಾರ್ಗವಾಗಿದೆ.

ಇಲ್ಲಿಗೆ ಬರುವ ಸಂದರ್ಶಕರು/ ಪ್ರವಾಸಿಗರು ದೋಣಿ ವಿಹಾರ, ಪಕ್ಷಿವೀಕ್ಷಣೆ ಮತ್ತು ದೇವಾಲಯವನ್ನು ಅನ್ವೇಶಿಸಬಹುದಾಗಿದೆ. ಹಾಗೂ ಇದು ಪಿಕ್‌ನಿಕ್ ಸ್ಪಾಟ್ ಕೂಡ ಆಗಿದೆ.