ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆ

ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆ ಮೈಸೂರು ವಿಶ್ವವಿದ್ಯಾನಿಲಯದ ಕನ್ನಡ ಚಟುವಟಿಕೆಗಳನ್ನೇಲ್ಲ ಕೇಂದ್ರೀಕರಿಸುವ ದೃಷ್ಟಿಯಿಂದ ೧೯೬೬ ರಲ್ಲಿ ರೂಪುಗೊಂಡ ಸಂಸ್ಥೆ. ಇದರ ಮೊದಲ ಹೆಸರು "ಕನ್ನಡ ಅಧ್ಯಯನ ಸಂಸ್ಥೆ"(ಐ.ಕೆ.ಎಸ್). ೧೯೯೪ ರಲ್ಲಿ ಕುವೆಂಪು ಅವರ ಗೌರವಾರ್ಥವಾಗಿ "ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆ" ಎಂದು ಪುನರ್ ನಾಮಕರಣ ಮಾಡಲಾಯಿತು. ಇದು ಮೈಸೂರು ವಿಶ್ವವಿದ್ಯಾನಿಲಯದಲ್ಲಿ ಆರಂಭವಾದ ಮೊದಲನೆ ಸಂಸ್ಥೆ (ಇನ್ ಸ್ಟಿಟ್ಯೂಟ್)ಯಾಗಿದೆ. ತನ್ನ ಸ್ವರೂಪ ವ್ಯಾಪ್ತಿಯಲ್ಲಿ ಭಾರತೀಯ ಭಾಷೆಯೊಂದರ ಅಧ್ಯಯನಕ್ಕೆ ಈ ಸಂಸ್ಥೆ ವಿಶಿಷ್ಟವಾಗಿದೆ.

ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆಯ ಕಟ್ಟಡ

ಇತಿವೃತ್ತ

ಶಿಕ್ಷಣದ ಎಲ್ಲ ಹಂತಗಳಲ್ಲಿಯೂ ಶಿಕ್ಷಣ ಮಾಧ್ಯಮವಾಗಿ ಆಡಳಿತದ ಎಲ್ಲ ಸ್ತರಗಳಲ್ಲಿಯೂ ಆಡಳಿತ ಭಾಷೆಯಾಗಿ, ಕನ್ನಡ ನಾಡಿನ ಜನಜೀವನದಲ್ಲಿ ಪ್ರಥಮ ಭಾಷೆಯಾಗಿ, ಕನ್ನಡಕ್ಕೆ ಗೌರವದ ಸ್ಥಾನಮಾನಗಳು ಲಭಿಸಬೇಕೆಂಬ ಸಂಕ್ರಮಣ ಕಾಲದಲ್ಲಿ ಕನ್ನಡ ಅಧ್ಯಯನ ಸಂಸ್ಥೆ ಆರಂಭವಾಯಿತು. ಮೈಸೂರು ವಿಶ್ವವಿದ್ಯಾನಿಲಯದ ಇತಿಹಾಸದಲ್ಲಿ ಹಾಗೂ ಕನ್ನಡ ಭಾಷಾಸಾಹಿತ್ಯಗಳ ಚಟುವಟಿಕೆಗಳ ಚರಿತ್ರೆಯಲ್ಲಿ ಈ ಅಧ್ಯಯನ ಸಂಸ್ಥೆ ಅಸ್ತಿತ್ವಕ್ಕೆ ಬಂದದ್ದು ಮಹತ್ವ್ತಪೂರ್ಣವಾದ, ಪರಿಣಾಮಕಾರಿಯಾದ ಘಟನೆ.

ಉದ್ದೇಶ/ ಆಶಯಗಳು

ಬೋದನೆ, ಸಂಶೋಧನೆ, ಸಂಪಾದನೆಗಳೊಂದಿಗೆ ಬೇರೆ ಭಾಷೆಗಳಿಂದ ಬಗೆ ಬಗೆಯ ಗ್ರಂಥಗಳನ್ನು ಕನ್ನಡಕ್ಕೆ ತರಬೇಕು. ಕನ್ನಡದ ಶ್ರೇಷ್ಠ ಕೃತಿಗಳನ್ನು ಇತರ ಭಾಷೆಗಳವರಿಗೆ ಪರಿಚಯಿಸಬೇಕು. ಇನ್ನೂ ಬೆಳಕಿಗೆ ಬಾರದ ಪ್ರಾಚೀನ ಗ್ರಂಥಗಳನ್ನು ಶಾಸ್ತ್ರೀಯ ವಾಗಿ ಪ್ರಕಟಿಸಬೇಕು. ಜಾನಪದ ವಿಷಯವನ್ನು ಅಧ್ಯಯನದ ವ್ಯಾಪ್ರಿಗೆ ಒಳಪಡಿಸಬೇಕು. ಭಾರತೀಯ ಸಾಹಿತ್ಯ ಹಿನ್ನೆಲೆಯಲ್ಲಿ ಕನ್ನಡದ ವಲಯವನ್ನು ವಿಸ್ತೃತಗೊಳಿಸಬೇಕು. ಕನ್ನಡ ಭಾಷೆಯನ್ನು ಆಧುನಿಕ ಕಾಲಕ್ಕೆ ಅನುಗುಣವಾಗಿ ಬಲಪಡಿಸಬೇಕು ಇವೇ ಮೊದಲಾದ ಉದ್ದೇಶ, ಆಶಯಗಳಿಗೆ ಅನುಗುಣವಾಗಿ ನಾನಾ ಕಡೆ ಹಂಚಿಹೋಗಿರುವ ಕನ್ನಡ ಶಕ್ತಿಗಳನ್ನೇಲ್ಲ ಒಂದೆಡೆ ಸೇರಿಸುವ ಸಲುವಾಗಿ ಈ ಸಂಸ್ಥೆ ರೂಪುಗೊಂಡಿದೆ.

ಯೋಜನೆಗಳು

1. ಕನ್ನಡ ವಿಶ್ವಕೋಶ ಮತ್ತು ವಿಷಯ ವಿಶ್ವಕೋಶ ಯೋಜನೆ
2. ಎಫಿಗ್ರಾಫಿಯ ಕರ್ನಾಟಕ
3. ಹರಿದಾಸ ಸಾಹಿತ್ಯ ಯೋಜನೆ
4. ಕನ್ನಡ ಸಾಹಿತ್ಯ ಚರಿತ್ರೆ ಯೋಜನೆ
5. ಜಾನಪದ ಸಂಶೋಧನೆ
6. ಜಾನಪದ ವಸ್ತು ಸಂಗ್ರಹಾಲಯ - ಇತ್ಯಾದಿ

ಭೌತಿಕ ಸ್ವರೂಪ/ರಚನೆ

ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆ ಅಪರೂಪವಾದ ಕಟ್ಟಡವನ್ನು ಹೊಂದಿದೆ. ಎರಡು ಅಂತಸ್ತಿನ ಈ ಕಟ್ಟಡದಲ್ಲಿ ಒಟ್ಟು ೪೦ ಕೊಠಡಿಗಳಿವೆ. ಸಂಸ್ಥೆಯೊಳಗೆ ಸುಸಜ್ಜಿತ ಗ್ರಂಥಾಲಯವಿದೆ. ಇಲ್ಲಿ ಸುಮಾರು ೪೫೦೦೦ಗ್ರಂಥಗಳಿವೆ. ಬಗೆ ಬಗೆಯ ಭಾಷೆಗಳಾದ ಇಂಗ್ಲೀಷ್, ಹಿಂದಿ, ತೆಲುಗು, ತಮಿಳು, ಮಲೆಯಾಳಂ, ಮರಾಠಿ ಮೊದಲಾದ ಭಾಷೆಗಳಲ್ಲಿನ ವಿಶ್ವಕೋಶಗಳು ಇಲ್ಲಿವೆ.ಸಭೆ ಸಮಾರಂಬಗಳನ್ನು ನಡೆಸಲು ವಿಭಿನ್ನ ಸ್ವರೂಪದ ನಾಲ್ಕು ವಿಶಿಷ್ಟ ಬಗೆಯ ಸಂರಚನಾ ಕೊಠಡಿಗಳಿವೆ. ಸುಮಾರು ೫೦ ಆಸನ ಗಳಿರುವ ಸಮಿತಿ ಕೊಠಡಿ, ನೂರೈವತ್ತು ಆಸನಗಳಿರುವ ಸಭಾಂಗಣ, ಇನ್ನೂರು ಆಸನಗಳಿರುವ ಬಿ.ಎಂ.ಶ್ರೀ ಸಭಾಂಗಣ, ನೂರು ಆಸನಗಳ ಸಭಾಮನೆ ಇವೆ. ಇವುಗಳಲ್ಲಿ ವಿಚಾರಸಂಕಿರಣ, ವಿಚಾರಗೋಷ್ಠಿ, ಪುಸ್ತಕ ಬಿಡುಗಡೆ, ವಿಶೇಷ ಉಪನ್ಯಾಸ, ವಿವಿಧ ಶಿಬಿರ, ಕಾರ್ಯಾಗಾರಗಳು ನಡೆಯುತ್ತವೆ.

ವಿವಿಧ ಶಾಖೆಗಳು

1. ಬೋದನಾಂಗಗಳು
2. ಸಂಶೋಧನಾ ಸೌಲಭ್ಯಗಳು
3. ಗಣಕ ಶಾಖೆ
4. ಸಂಪಾದನಾ ವಿಭಾಗ
5. ಭಾಷಾಂತರ ಮತ್ತು ಪಠ್ಯ ಪುಸ್ತಕ ವಿಭಾಗ
6. ಸುಸಜ್ಜಿತ ಗ್ರಂಥಾಲಯ
7. ಹಸ್ತಪ್ರತಿ ವಿಭಾಗ

ಪ್ರಕಟಣೆಗಳು

ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆಯಿಂದ ಇಲ್ಲಿಯವರೆಗೆ ಒಟ್ಟು ೫೮೦ ಕೃತಿಗಳು ಪ್ರಕಟವಾಗಿವೆ.

1. ಅನುವಾದಿತ ಕೃತಿಗಳು ೨೪೦,
2. ಸಂಪಾದಿತ ಕೃತಿಗಳು ೧೪೫,
3. ಜಾನಪದಕ್ಕೆ ಸಂಬಂಧಿಸಿದ ಕೃತಿಗಳು ೧೦೦,
4. ದಾಸಸಾಹಿತ್ಯಕ್ಕೆ ಸಂಬಂಧಿಸಿದ ಕೃತಿಗಳು ೨೫,
5. ಇಂಗ್ಲೀಷ್ ಕೃತಿಗಳು ೨೦,
6. ಇತರ ಪ್ರಕಟಣೆಗಳು ೫೦.

ನಿರ್ದೇಶಕರ ಪಟ್ಟಿ

ಕುವೆಂಪು ಕನ್ನಡ ಅಧ್ಯಯನ ಸಂಸ್ಥೆಯಲ್ಲಿ ಇಲ್ಲಿಯವರೆಗೆ ನಿರ್ದೇಶಕರಾಗಿ ಸೇವೆ ಸಲ್ಲಿಸಿರುವ ಪ್ರಾಧ್ಯಾಪಕರ ಪಟ್ಟಿ ಹೀಗಿವೆ-

1. ದೇ. ಜವರೇಗೌಡ - ೧೯೬೬ - ೧೯೬೯
2. ಹಾ.ಮಾ.ನಾಯಕ - ೧೯೬೯ - ೧೯೮೪
3. ಎಚ್. ತಿಪ್ಪೇರುದ್ರಸ್ವಾಮಿ - ೧೯೮೪ - ೧೯೮೭
4. ಜೀ.ಶಂ. ಪರಮಶಿವಯ್ಯ - ೧೯೮೭ - ೧೯೮೯
5. ಸಿ.ಪಿ.ಕೃಷ್ಣಕುಮಾರ್ - ೧೯೮೯ - ೧೯೯೧
6. ಟಿ. ವಿ. ವೆಂಕಟಾಚಲಶಾಸ್ತ್ರಿ - ೧೯೯೧ - ೧೯೯೩
7. ಎಚ್.ಎಂ.ಚನ್ನಯ್ಯ - ೧೯೯೩ - ೧೯೯೫
8. ಕೆಂಪೇಗೌಡ - ೧೯೯೫ - ೧೯೯೭
9. ಡಿ.ಕೆ.ರಾಜೇಂದ್ರ - ೧೯೯೭ - ೧೯೯೯
10. ಸಿ. ಪಿ. ಸಿದ್ದಾಶ್ರಮ - ೧೯೯೯ - ೨೦೦೧
11. ಅರವಿಂದ ಮಾಲಗತ್ತಿ - ೨೦೦೧ - ೨೦೦೨
12. ಡಿ. ಕೆ. ರಾಜೇಂದ್ರ - ೧-೧-೨೦೦೨ - ೧೨-೪ ೨೦೦೨
13. ಸಿ. ಪಿ. ಸಿದ್ದಾಶ್ರಮ - ೧೩-೪- ೨೦೦೨ - ೧೪-೪-೨೦೦೪
14. ಅರವಿಂದ ಮಾಲಗತ್ತಿ - ೧೫-೪- ೨೦೦೪ - ೨೦೦೬
15. ಹಿ. ಶಿ. ರಾಮಚಂದ್ರೇಗೌಡ - ೨೦೦೬ - ೨೦೦೮
16. ಅಂಬಳಿಕೆ ಹಿರಿಯಣ್ಣ - ೨೦೦೮ - ೨೦೧೦
17. ಗಂಗಾನಾಯಕ್ - ೨೦೧೦-೨೦೧೨
18. ನೀಲಗಿರಿ ತಳವಾರ್ - ೨೦೧೨ - ೨೦೧೪
19. ಆರ್. ರಾಮಕೃಷ್ಣ - ೨೦೧೪ - ೨೦೧೬
20. ಪ್ರೀತಿ ಶುಭಚಂದ್ರ - ೨೦೧೬ -