ಟಿ.ವಿ.ಸುಂದರಂ ಅಯ್ಯಂಗಾರ್

ತಿರುಕುರುಂಗುಡಿ ವೆಂಗರಂ ಸುಂದರಂ ಅಯ್ಯಂಗಾರ್ (೨೨ ಮಾರ್ಚ್ ೧೮೭೭ - ೨೮ ಏಪ್ರಿಲ್ ೧೯೫೫) ಒಬ್ಬ ಭಾರತೀಯ ಕೈಗಾರಿಕೋದ್ಯಮಿ ಮತ್ತು ಆಟೋಮೊಬೈಲ್ ಪ್ರವರ್ತಕರಾಗಿದ್ದರು. ೧೯೧೧ರಲ್ಲಿ, ಅವರು ಟಿ.ವಿ.ಸುಂದರಂ ಅಯ್ಯಂಗಾರ್ ಮತ್ತು ಸನ್ಸ್ ಎಂಬ ಬಸ್ ಕಂಪನಿಯನ್ನು ಸ್ಥಾಪಿಸಿದರು, ಇದು ನಂತರ ಆಟೋಮೊಬೈಲ್ ಉತ್ಪಾದನೆಗೆ ವೈವಿಧ್ಯಮಯವಾಯಿತು ಮತ್ತು ಭಾರತದ ಅತಿದೊಡ್ಡ ವ್ಯಾಪಾರ ಸಂಸ್ಥೆಗಳಲ್ಲಿ ಒಂದಾದ ಟಿವಿಎಸ್ ಗ್ರೂಪ್ನ ಮೂಲ ಕಂಪನಿಯಾಗಿ ಹೊರಹೊಮ್ಮಿತು. ವಕೀಲರಾಗಿ ಅವರ ವಿನಮ್ರ ಪ್ರಾರಂಭದೊಂದಿಗೆ, ಅವರು ತಮ್ಮ ಕಾಲದ ಅತ್ಯಂತ ಯಶಸ್ವಿ ಕೈಗಾರಿಕೋದ್ಯಮಿಗಳಲ್ಲಿ ಒಬ್ಬರಾಗಿ ಬೆಳೆದರು. ಅವರ ಮಗ ಟಿ.ಎಸ್.ದೊರೈಸ್ವಾಮಿ ಸ್ಥಾಪಿಸಿದ ಟಿವಿಎಸ್ ಮೋಟಾರ್ಸ್ ಈ ಸಮೂಹದ ಪ್ರಮುಖ ಕಂಪನಿಯಾಗಿದೆ. ಅವರು ರಾಜ್ಯದ ಮೊದಲ ಬಸ್ ಸೇವೆಯ ಮೂಲಕ ಹಿಂದಿನ ಮದ್ರಾಸ್ ಪ್ರೆಸಿಡೆನ್ಸಿಯಲ್ಲಿ ರಸ್ತೆ ಸಾರಿಗೆ ಉದ್ಯಮಕ್ಕೆ ಅಡಿಪಾಯ ಹಾಕಿದರು. ಹೀಗೆ ಅವರು ಪ್ರಾರಂಭಿಸಿದ ಟಿವಿಎಸ್ ಸಮೂಹವು ಈಗ ಮೋಟಾರು ಉದ್ಯಮ, ಆಟೋ ಸೇವೆಗಳಿಂದ ಹಣಕಾಸು ಸೇವೆಗಳವರೆಗೆ ವಿಸ್ತರಿಸಿದೆ.

ಜನನ ಮತ್ತು ಆರಂಭಿಕ ಜೀವನ

ಟಿ.ವಿ.ಸುಂದರಂ ಅಯ್ಯಂಗಾರ್ ಅವರು ೧೮೭೭ರ ಆರಂಭದಲ್ಲಿ ಭಾರತದ ತಮಿಳುನಾಡು ರಾಜ್ಯದ ತಿರುಕುರುಂಗುಡಿಯಲ್ಲಿ ತಮಿಳು ಬ್ರಾಹ್ಮಣ ಕುಟುಂಬದಲ್ಲಿ ಜನಿಸಿದರು. ಸುಂದರಂ ಅಯ್ಯಂಗಾರ್ ಅವರು ವಕೀಲರಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ಅವರ ತಂದೆಯ ಇಚ್ಛೆಯಂತೆ, ಅವರು ನಂತರ ಭಾರತೀಯ ರೈಲ್ವೆಯಲ್ಲಿ ಮತ್ತು ನಂತರ ಬ್ಯಾಂಕಿನಲ್ಲಿ ಕೆಲಸ ಮಾಡಲು ತೆರಳಿದರು.

ಕೈಗಾರಿಕೋದ್ಯಮಿಯಾಗಿ

ಸುಂದರಂ ಅಯ್ಯಂಗಾರ್ ತಮ್ಮ ಉದ್ಯೋಗವನ್ನು ತೊರೆದು ೧೯೧೧ರಲ್ಲಿ ಮಧುರೈ ನಗರದಲ್ಲಿ ಮೊದಲ ಬಾರಿಗೆ ಬಸ್ ಸೇವೆಯನ್ನು ಪ್ರಾರಂಭಿಸುವ ಮೂಲಕ ದಕ್ಷಿಣ ಭಾರತದಲ್ಲಿ ಮೋಟಾರು ಸಾರಿಗೆ ಉದ್ಯಮಕ್ಕೆ ಅಡಿಪಾಯ ಹಾಕಿದರು. ಅವರು ೧೯೧೧ರಲ್ಲಿ ಟಿ.ವಿ.ಸುಂದರಂ ಅಯ್ಯಂಗಾರ್ ಅಂಡ್ ಸನ್ಸ್ ಲಿಮಿಟೆಡ್ ಅನ್ನು ಸ್ಥಾಪಿಸಿದರು, ಇದು ೧೯೫೫ ರಲ್ಲಿ ಅವರ ಮರಣದ ವೇಳೆಗೆ ಸದರ್ನ್ ರೋಡ್ವೇಸ್ ಲಿಮಿಟೆಡ್ ಎಂಬ ಶೀರ್ಷಿಕೆಯಡಿಯಲ್ಲಿ ಹಲವಾರು ಬಸ್ಸುಗಳು ಮತ್ತು ಲಾರಿಗಳನ್ನು ನಿರ್ವಹಿಸಿತು.ಇದು ಟಿವಿಎಸ್ ಗ್ರೂಪ್ನ ಉಗಮಕ್ಕೆ ದಾರಿ ಮಾಡಿಕೊಟ್ಟಿತು.

ಎರಡನೆಯ ಮಹಾಯುದ್ಧದ ಸಮಯದಲ್ಲಿ, ಮದ್ರಾಸ್ ಪ್ರೆಸಿಡೆನ್ಸಿಯು ಪೆಟ್ರೋಲ್ ಕೊರತೆಯನ್ನು ಎದುರಿಸಿತು. ಅದರ ಬೇಡಿಕೆಗಳನ್ನು ಪೂರೈಸಲು, ಸುಂದರಂ ಅಯ್ಯಂಗಾರ್ ರವರು ಟಿವಿಎಸ್ ಅನಿಲ ಸ್ಥಾವರವನ್ನು ವಿನ್ಯಾಸಗೊಳಿಸಿದರು ಮತ್ತು ಅನಿಲ ಉತ್ಪಾದಿಸಿದರು. ಮದ್ರಾಸ್ ಆಟೋ ಸರ್ವಿಸ್ ಲಿಮಿಟೆಡ್ ಮತ್ತು ಟಿ.ವಿ.ಸುಂದರಂ ಅಯ್ಯಂಗಾರ್ & ಸನ್ಸ್ ಲಿಮಿಟೆಡ್ನ ವಿಭಾಗವಾದ ಸುಂದರಂ ಮೋಟಾರ್ಸ್ ಜೊತೆಗೆ ಅವರು ರಬ್ಬರ್ ಮರುಬಳಕೆಗಾಗಿ ಕಾರ್ಖಾನೆಯನ್ನು ಸಹ ಪ್ರಾರಂಭಿಸಿದರು. ಮೊದಲನೆಯದು ೧೯೫೦ರ ದಶಕದಲ್ಲಿ ಜನರಲ್ ಮೋಟಾರ್ಸ್ ನ ಅತಿದೊಡ್ಡ ವಿತರಕರಾಗಿದ್ದರು. ಒಬ್ಬ ವ್ಯಕ್ತಿಯ ಉತ್ಸಾಹವಾಗಿ ಪ್ರಾರಂಭವಾದ ಇದು ಶೀಘ್ರದಲ್ಲೇ ಕುಟುಂಬದ ವ್ಯವಹಾರವಾಯಿತು.

ಸುಂದರಂ ಅಯ್ಯಂಗಾರ್ ಅವರಿಗೆ ಐದು ಗಂಡು ಮಕ್ಕಳು ಮತ್ತು ಮೂವರು ಹೆಣ್ಣುಮಕ್ಕಳಿದ್ದರು. ಅವರದ್ದು ಪಿತೃಪ್ರಭುತ್ವದ ತಮಿಳು ಬ್ರಾಹ್ಮಣ ಕುಟುಂಬವಾದ ಕಾರಣ ಎಲ್ಲಾ ಪುರುಷ ಸದಸ್ಯರು ವ್ಯವಹಾರದಲ್ಲಿ ತೊಡಗಿದರು. ಅವರ ಮಗ ಟಿ.ಎಸ್.ದೊರೈಸಾಮಿಯವರ ಅಕಾಲಿಕ ಮರಣದೊಂದಿಗೆ, ಇತರ ನಾಲ್ವರು ಪುತ್ರರಾದ ಟಿ.ಎಸ್.ರಾಜಮ್, ಟಿ.ಎಸ್.ಸಂತಾನಂ, ಟಿ.ಎಸ್.ಶ್ರೀನಿವಾಸನ್ ಮತ್ತು ಟಿ.ಎಸ್.ಕೃಷ್ಣ ಅವರು ವ್ಯವಹಾರದ ಅವಿಭಾಜ್ಯ ಅಂಗವಾದರು.

ಶ್ರೀ ಸುಂದರಂ ಅಯ್ಯಂಗಾರ್ ಸ್ಥಾಪಿಸಿದ ಗ್ರೂಪ್, ಕಂಪನಿಯ ಪ್ರಕಾರ, ಪ್ರಸ್ತುತ ಭಾರತದ ಅತಿದೊಡ್ಡ ಆಟೋಮೊಬೈಲ್ ವಿತರಣಾ ಕಂಪನಿಯಾಗಿದೆ, ಸುಮಾರು ಯುಎಸ್ $ ೮.೫ ಬಿಲಿಯನ್ ವಹಿವಾಟು ಹೊಂದಿದೆ ಮತ್ತು ೬೦,೦೦೦ಕ್ಕೂ ಹೆಚ್ಚು ಉದ್ಯೋಗಿಗಳು ಕಾರ್ಯನಿರ್ವಹಿಸುತ್ತಿದ್ದಾರೆ. ಈ ಸಮೂಹವು ಆಟೋಮೋಟಿವ್ ಕಾಂಪೊನೆಂಟ್ ಮ್ಯಾನುಫ್ಯಾಕ್ಚರಿಂಗ್, ಆಟೋಮೋಟಿವ್ ಡೀಲರ್ಶಿಪ್ಗಳು, ಫೈನಾನ್ಸ್ ಮತ್ತು ಎಲೆಕ್ಟ್ರಾನಿಕ್ಸ್, ಜೊತೆಗೆ ಐಟಿ ಪರಿಹಾರಗಳು ಮತ್ತು ಸೇವೆಗಳಂತಹ ವೈವಿಧ್ಯಮಯ ಕ್ಷೇತ್ರಗಳಲ್ಲಿ ಕಾರ್ಯನಿರ್ವಹಿಸುತ್ತದೆ.

ವೈಯಕ್ತಿಕ ಜೀವನ

ಟಿ.ವಿ. ಸುಂದರಂ ಅಯ್ಯಂಗಾರ್ ಅವರು ಲಕ್ಷ್ಮಿ ಅಮ್ಮಾಳ್ ಅವರನ್ನು ವಿವಾಹವಾದರು ಮತ್ತು ಅವರಿಗೆ ಎಂಟು ಮಕ್ಕಳಿದ್ದರು - ಐದು ಗಂಡು ಮಕ್ಕಳು ಮತ್ತು ಮೂವರು ಹೆಣ್ಣುಮಕ್ಕಳು. ಅವರ ಮಗ ಟಿ.ಎಸ್.ದೊರೈಸ್ವಾಮಿ ಚಿಕ್ಕ ವಯಸ್ಸಿನಲ್ಲಿಯೇ ನಿಧನರಾದರು. ಟಿ.ಎಸ್.ಸೌಂದರಾಮ್ ರವರು ಟಿ.ವಿ.ಸುಂದರಂ ಅಯ್ಯಂಗಾರ್ ಅವರ ಮಗಳಾಗಿದ್ದರು. ಮಹಾತ್ಮ ಗಾಂಧಿಯವರ ಒತ್ತಾಯದ ಮೇರೆಗೆ, ಹದಿಹರೆಯದ ವಿಧವೆಯಾಗಿದ್ದ ಟಿ.ಎಸ್.ಸೌಂದರಾಮ್ ಅವರು ಜಿ.ರಾಮಚಂದ್ರನ್ (ಸಮಾಜ ಸುಧಾರಕ) ಅವರೊಂದಿಗೆ ವಿವಾಹವಾದರು. ನಂತರ ಟಿ.ಎಸ್. ಸೌಂದರಾಮ್ ಗಾಂಧಿಯವರೊಂದಿಗೆ ಭಾರತೀಯ ಸ್ವಾತಂತ್ರ್ಯ ಚಳವಳಿಯಲ್ಲಿ ತಮ್ಮನ್ನು ತೊಡಗಿಸಿಕೊಂಡರು. ನಂತರ ಅವರ ಗೌರವಾರ್ಥ ಅಂಚೆ ಚೀಟಿಯನ್ನು ಬಿಡುಗಡೆ ಮಾಡಿ ಗೌರವಿಸಲಾಯಿತು.

ಟಿ.ವಿ.ಸುಂದರಂ ಅಯ್ಯಂಗಾರ್ ಅವರು ಯಶಸ್ವಿ ಉದ್ಯಮಿಯಲ್ಲದೆ, ಕಲೆಗಳ ಪೋಷಕರಾಗಿದ್ದರು ಕೂಡ. ಹಿರಿಯ ರಾಜನೀತಿಜ್ಞ ಮತ್ತು ಆ ಸಮಯದಲ್ಲಿ ಭಾರತದ ಗವರ್ನರ್ ಜನರಲ್ ಆಗಿದ್ದ ರಾಜಾಜಿ ಅವರು ನಿವೃತ್ತಿ ಹೊಂದಿ ವ್ಯಾಪಾರವನ್ನು ತಮ್ಮ ಪುತ್ರರಿಗೆ ಹಸ್ತಾಂತರಿಸಿದ್ದಕ್ಕಾಗಿ ಟಿ.ವಿ. ಸುಂದರಂ ಅಯ್ಯಂಗಾರ್ ಅವರನ್ನು ಶ್ಲಾಘಿಸಿದರು.

ಮರಣ

ಅವರು ಏಪ್ರಿಲ್ ೨೮, ೧೯೫೫ ರಂದು ತಮ್ಮ 78 ನೇ ವಯಸ್ಸಿನಲ್ಲಿ ಕೊಡೈಕೆನಾಲ್ನಲ್ಲಿರುವ ತಮ್ಮ ನಿವಾಸದಲ್ಲಿ ನಿಧನರಾದರು ಮತ್ತು ಆ ಸಮಯದಲ್ಲಿ ಅವರ ಪತ್ನಿ, ನಾಲ್ವರು ಪುತ್ರರು ಮತ್ತು ಮೂವರು ಪುತ್ರಿಯರನ್ನು ಅಗಲಿದ್ದರು.

ಗೌರವಗಳು

ಆಗಸ್ಟ್ ೭, ೧೯೫೬ ರಂದು ತಮಿಳುನಾಡಿನ ಮಧುರೈ ನಗರದಲ್ಲಿ ಕಂಚಿನ ಮತ್ತು ಅಮೃತಶಿಲೆಯಲ್ಲಿ ಪ್ರತಿಮೆಯನ್ನು ಅನಾವರಣಗೊಳಿಸುವ ಮೂಲಕ ಸುಂದರಂ ಅಯ್ಯಂಗಾರ್ ಅವರನ್ನು ಭಾರತ ಸರ್ಕಾರ ಗೌರವಿ ನೀಡಿತು.