ಗುಲ್ಗುಲಾ

ಗುಲ್ಗುಲಾ ಒಡಿಶಾದ ಒಂದು ಸಾಂಪ್ರದಾಯಿಕ ಸಿಹಿ ತಿಂಡಿಯಾಗಿದೆ ಮತ್ತು ಭಾರತದ ವಿವಿಧ ಪ್ರದೇಶಗಳಲ್ಲಿ ತಯಾರಿಸಲ್ಪಡುತ್ತದೆ. ಇದು ಮಾರುಕಟ್ಟೆಗಳಲ್ಲಿ ಸಿಗುವ ಅತ್ಯಂತ ಜನಪ್ರಿಯ ಸಿಹಿ ತಿಂಡಿಗಳಲ್ಲಿ ಒಂದಾಗಿದೆ. ಗ್ರಾಮೀಣ ಪ್ರದೇಶಗಳಲ್ಲಿ ಇದನ್ನು ಸಾಂಪ್ರದಾಯಿಕವಾಗಿ ವಿಶೇಷ ಹಬ್ಬದ ಸಂದರ್ಭಗಳಲ್ಲಿ ತಯಾರಿಸಲಾಗುತ್ತದೆ. ಇವು ಉತ್ತರಾಖಂಡ್, ಉತ್ತರ್ ಪ್ರದೇಶ್, ಬಿಹಾರ್, ಪಂಜಾಬ್, ಒಡಿಶಾದಲ್ಲಿ ಸಾಮಾನ್ಯವಾಗಿವೆ.

ಗುಲ್ಗುಲಾಗಳು ಹಲವು ವೇಳೆ ದುಂಡಾಗಿರುತ್ತವೆ ಆದರೆ ಯಾವಾಗಲೂ ಇರಬೇಕೆಂದೇನಿಲ್ಲ.

ಇವು ಅಮೇರಿಕದಲ್ಲಿನ ಡೋನಟ್‍ಗಳನ್ನು ಹೋಲುತ್ತವೆ ಮತ್ತು ಇವನ್ನು ಮಾಡುವುದು ಬಹಳ ಸುಲಭವಾಗಿದೆ. ಇವು ಸಾಮಾನ್ಯ ಗೋಧಿ ಹಿಟ್ಟು, ಸಕ್ಕರೆ (ಸಾಂಪ್ರದಾಯಿಕವಾಗಿ ಬೆಲ್ಲ) ಮತ್ತು ಕಂಪು/ರುಚಿ ನೀಡಲು ಸಾಂದರ್ಭಿಕವಾಗಿ ಸಂಬಾರ ಪದಾರ್ಥಗಳನ್ನು (ಸೊಂಪಿನ ಬೀಜಗಳು ಸಾಮಾನ್ಯವಾಗಿವೆ) ಬಳಸುತ್ತವೆ. ಮೊಸರು, ಬಾಳೆಹಣ್ಣಿನ ತಿಳ್ಳು, ಯೀಸ್ಟ್ ಅಥವಾ ಒದಗುಪುಡಿಯನ್ನು ಬಳಸಲಾಗಬಹುದು. ಡೋನಟ್‍ಗಳಂತೆ ಇವನ್ನು ಎಣ್ಣೆ ಅಥವಾ ತುಪ್ಪದಲ್ಲಿ ಕರಿಯಲಾಗುತ್ತದೆ.