ಇರುಳುಗಣ್ಣು ತುಲನಾತ್ಮಕವಾಗಿ ಮಂದ ಬೆಳಕಿನಲ್ಲಿ ನೋಡಲು ಕಠಿಣ ಅಥವಾ ಅಸಾಧ್ಯವಾಗುವ ಪರಿಸ್ಥಿತಿ. ಇದು ಹಲವಾರು ನೇತ್ರರೋಗಗಳ ಲಕ್ಷಣವಾಗಿದೆ. ಇರುಳುಗಣ್ಣು ಹುಟ್ಟಿನಿಂದಲೇ ಇರಬಹುದು, ಅಥವಾ ಗಾಯ ಅಥವಾ ಅಪೌಷ್ಟಿಕತೆಯಿಂದ (ಉದಾಹರಣೆಗೆ, ವಿಟಮಿನ್ ಎಯ ಕೊರತೆ) ಉಂಟಾಗಬಹುದು. ಇದನ್ನು ಕತ್ತಲೆಗೆ ಸಾಕಾಗದಷ್ಟು ಹೊಂದಿಕೊಳ್ಳುವಿಕೆ ಎಂದು ವಿವರಿಸಬಹುದು.

ಇರುಳುಗಣ್ಣಿನ ಪರಿಣಾಮ. ಎಡ: ಸಾಮಾನ್ಯ ರಾತ್ರಿ ದೃಷ್ಟಿ, ಬಲ: ಇರುಳುಗಣ್ಣು

ರೆಟಿನೈಟಿಸ್ ಪಿಗ್ಮೆಂಟೋಸಾ (ರೆಟಿನಾದಲ್ಲಿ ಕಪ್ಪುವರ್ಣ ಆಗುವಿಕೆ/ಹೆಚ್ಚುವಿಕೆ) ಇರುಳುಗಣ್ಣಿನ ಅತ್ಯಂತ ಸಾಮಾನ್ಯ ಕಾರಣವಾಗಿದೆ. ಈ ಕಾಯಿಲೆಯಲ್ಲಿ ರೆಟಿನಾದಲ್ಲಿನ ಕೋಲಾಕಾರದ ಜೀವಕೋಶಗಳು ಕ್ರಮೇಣವಾಗಿ ಬೆಳಕಿಗೆ ಪ್ರತಿಕ್ರಿಯಿಸುವ ತಮ್ಮ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತವೆ. ಈ ಆನುವಂಶಿಕ ಸ್ಥಿತಿಯಿಂದ ಬಾಧಿತರಾದ ರೋಗಿಗಳು ಕ್ರಮೇಣ ಹೆಚ್ಚುವ ಇರುಳುಗಣ್ಣನ್ನು ಹೊಂದಿರುತ್ತಾರೆ ಮತ್ತು ಅಂತಿಮವಾಗಿ ಅವರ ಹಗಲುಸಮಯದ ದೃಷ್ಟಿಯ ಮೇಲೂ ಪ್ರಭಾವ ಆಗಬಹುದು. ಎಕ್ಸ್-ಸಂಬಂಧಿತ ಜನ್ಮಜಾತ ಸ್ಥಿರ ಇರುಳುಗಣ್ಣಿನಲ್ಲಿ, ಜನ್ಮದಿಂದಲೇ ಕೋಲಾಕಾರದ ಕೋಶಗಳು ಕೆಲಸವೇ ಮಾಡುವುದಿಲ್ಲ ಅಥವಾ ಬಹಳ ಕಡಿಮೆ ಕೆಲಸ ಮಾಡುತ್ತವೆ, ಆದರೆ ಈ ಪರಿಸ್ಥಿತಿ ಕೆಟ್ಟದಾಗುತ್ತ ಹೋಗುವುದಿಲ್ಲ. ರೆಟಿನಾಲ್ ಅಥವಾ ವಿಟಮಿನ್ ಎ ಯ ಕೊರತೆ ಇರುಳುಗಣ್ಣಿನ ಮತ್ತೊಂದು ಕಾರಣವಾಗಿದೆ. ವಿಟಮಿನ್ ಎ ಯನ್ನು ಮೀನು ಎಣ್ಣೆಗಳು ಮತ್ತು ಕ್ಷೀರೋತ್ಪನ್ನಗಳಿಂದ ಪಡೆಯಬಹುದು.

ಇದರ ವಿರುದ್ಧವಾದ ಸಮಸ್ಯೆ, ಅಂದರೆ ಉಜ್ಜ್ವಲ ಬೆಳಕಿನಲ್ಲಿ ನೋಡುವ ಅಸಾಮರ್ಥ್ಯವನ್ನು ಹಗಲುಕುರುಡು ಎಂದು ಕರೆಯಲಾಗುತ್ತದೆ. ಇದು ಹೆಚ್ಚು ಅಪರೂಪವಾಗಿದೆ.

ರೆಟಿನಾದ ಹೊರ ಪ್ರದೇಶವು ಶಂಕುವಿನಾಕಾರದ ಕೋಶಗಳಿಗಿಂತ ಹೆಚ್ಚು ಕೋಲಾಕಾರದ ಕೋಶಗಳಿಂದ ರೂಪಗೊಂಡಿರುವುದರಿಂದ, ಅಂಚಿನ ದೃಷ್ಟಿಯ ಹಾನಿಯು ಹಲವುವೇಳೆ ಇರುಳುಗಣ್ಣಾಗಿ ಪರಿಣಮಿಸುತ್ತದೆ. ಇರುಳುಗಣ್ಣಿನಿಂದ ನರಳುತ್ತಿರುವ ವ್ಯಕ್ತಿಗಳು ಕೇವಲ ರಾತ್ರಿಯಲ್ಲಿ ಕಡಿಮೆ ಕಾಣುವುದಷ್ಟೇ ಅಲ್ಲದೇ, ಅವರಿಗೆ ತಮ್ಮ ಕಣ್ಣುಗಳು ಉಜ್ಜ್ವಲ ಬೆಳಕಿನ ಪ್ರದೇಶಗಳಿಂದ ಮಂದ ಬೆಳಕಿನ ಪ್ರದೇಶಗಳಿಗೆ ಹೊಂದಿಕೊಳ್ಳಲು ಹೆಚ್ಚು ಸಮಯ ಬೇಕಾಗುತ್ತದೆ. ವೈದೃಶ್ಯ ದೃಷ್ಟಿಯೂ ಬಹಳವಾಗಿ ಕಡಿಮೆಯಾಗಬಹುದು.

ಕೋಲಾಕಾರದ ಕೋಶಗಳು ರೋಡಾಪ್ಸಿನ್ ಎಂದು ಕರೆಯಲ್ಪಡುವ ಗ್ರಾಹಿ ಪ್ರೋಟೀನನ್ನು ಹೊಂದಿರುತ್ತವೆ. ಬೆಳಕು ರೋಡಾಪ್ಸಿನ್ ಮೇಲೆ ಬಿದ್ದಾಗ, ಅದು ಅನೇಕ ಆಕಾರ ಸಂಬಂಧಿ ಬದಲಾವಣೆಗಳಿಗೆ ಒಳಗಾಗುತ್ತದೆ, ಅಂತಿಮವಾಗಿ ವಿದ್ಯುತ್ ಸಂಕೇತಗಳನ್ನು ಉತ್ಪಾದಿಸುತ್ತದೆ. ಇವನ್ನು ಚಾಕ್ಷುಷ ನರದ ಮೂಲಕ ಮಿದುಳಿಗೆ ಸಾಗಿಸಲಾಗುತ್ತದೆ. ಬೆಳಕಿನ ಅನುಪಸ್ಥಿತಿಯಲ್ಲಿ ರೋಡಾಪ್ಸಿನ್‍ನ ಪುನರುತ್ಪಾದನೆಯಾಗುತ್ತದೆ. ಶರೀರವು ವಿಟಮಿನ್ ಎ ಯಿಂದ ರೋಡಾಪ್ಸಿನ್ ಅನ್ನು ಸಂಶ್ಲೇಷಿಸುತ್ತದೆ, ಇದೇ ಕಾರಣದಿಂದಲೇ ವಿಟಮಿನ್ ಎ ಯ ಕೊರತೆ ಕಳಪೆ ದೃಷ್ಟಿಗೆ ಕಾರಣವಾಗುತ್ತದೆ.